السلام عليكم ورحمة الله وبركاتة

مساء الفل على الكل

أكيد شفتوا مواقف كثيره في حياتكم وقلتوا في أنفسكم هذا شين وقوي عين

خلوني أستعرض معكم بعض العينات هذي

************



شين وقوي عين


تتعب نفسك وتكتب وتحاول تنقل شي مفيد للناس وتجتهد

واخرتها يجيك واحد يرد عليك ويرفع ضغطك لأن الموضوع ما اعجبه ..

طيب اذا ما اعجبك الموضوع رد براحتك

لكن ليه ما ترد على الموضوع اللي يعجبك بعد حتى تكون حيادي ..

النقد مطلوب والتحفيز مطلوب .. لا يصير همك هو انك تكسر مجاديف غيرك وبس

أستغرب من وجود ناس ما ترد الا على اللي ما يعجبهم ويكتبون تعليقات وش طولها !!

اما اللي يعجبهم يقرونه وبس ولا يكلفون نفسهم بكتابة حرف واحد



....



شين وقوي عين


حاط نغمة جواله أغنيه كامله بالطقطقه ..

اذا دق جواله في مكان عام تلاقي الناس تلتفت تشوف من هالمراهق

ويقولون في انفسهم الله يهديه

لكن توصل انه يخلي النغمه تنسمع حتى وقت الاذان أو اثناء الصلاة واحيانا في المسجد .!

لا تقول ناسي احطه عالصامت ..

دامك تعرف من الاساس انه غلط ليه مخليها نغمه وتسمع الناس وتاخذ اثمهم ؟



....



شين وقوي عين


ينام وتفوته الصلاة واذا احد قاله خف ربك قال ياخي كنت نايم وش اسوي !

لكن اذا جاء وقت الدوام او وقت المدرسه ما ينام !!

ايه ذكرت

اكيد انك تحط المنبه على وقت الدوام او المدرسه

طيب ليه ما تحط المنبه على وقت الصلاة ؟؟

واجه نفسك الاماره بالسوء ولا تصير جبان مثل النعامه وتحط راسك في الارض وتصرف الموضوع


....


شين وقوي عين


يشخص ويروح مع اهله للسوق .. على باله محرم

كل وقته في السوق يناظر حريم خلق الله ويغازل

واذا احد ناظر اهله طلعت الغيره والرجوله

يبو الشباب كما تدين تدان

يا انك تروح مع اهلك وتصون عرضك واعراض الناس والا الله لا يهينك انطق في بيتكم

ترى كل الناس يغارون على اهلهم

مهوب عذر انك تشوف وحده متبرجه وتقول بغازلها لانها ما احترمت نفسها

يكون بعلمك ترى فيه ناس منقطعين ولو يشوفون الحرمه مطلعه اصبع رجلها الكبير ضاعت علومهم

استح على وجهك وناظر عيوبك قبل تناظر الحريم


...


شين وقوي عين


يشجع فريق زلابه وكل يوم ينهزم والمشكله يتابع كل مبارياته

وقت المباراة تلاقيه يسب ويلعن في الحكم والجمهور

واذا فاز فريقه في السنه حسنه رج العالم بالتفحيط

يا اما تشجع فريق صح والا امسك لسانك اقل شي

ولا تخلي الكوره مصدر لزيادة سيئاتك


....



شين وقوي عين


اذا قالوا له اهله طلعنا نتمشى يرفض ويقول مشغول

يقولون له ترانا في اجازه نبغى نغير جو ويرفض بعد

لكن اذا قالوا له اخوياه مشينا لديرة الوناسه قال قدام وش ورانا

واهله المساكين محجورين حتى حدايق البلديه اللي بلاش ما طبوها


....


شين وقوي عين


كل ما شاف برميل النفايات قريب من بيته قام يدفه لين يوصل بيت جاره

ويا ويل اللي يحط البرميل عند بيته

وهو يرمي نفاياته جنب البرميل عند بيت جاره ..!

استح على وجهك يا جار السوء

اللي ما ترضاه على نفسك لا ترضاه على غيرك



**************


لو بذكر كل الامثله بتعب وبتتعبون

اكتفي بهذه العينات والباقي عليكم



في امان الله


بقلمي .. خلوني آل خلوني